وزّعت أمي وجوزي وخطفت البنت وهربت.. ننشر أقوال والدة رضيعة الحسين في التحقيقات
خميس, مايو 07 2026
وزّعت أمي وجوزي وخطفت البنت وهربت.. ننشر أقوال والدة رضيعة الحسين في التحقيقات
تفاصيل أوراق قضية خطف رضيعة الحسين، التي وقعت منتصف الشهر الماضي، بمنطقة الجمالية بالقاهرة، إذ تضمنت الأوراق شهادة والدة الرضيعة وكيف تقابلت مع المتهمة، وسبب قبولها مساعدتها واكتشافها خطف ابنتها.
أقوال والدة رضيعة الحسين في التحقيقات
واستمع رجال التحقيق إلى والدة رضيعة الحسين وجاءت أقوالها كالآتي: اللي حصل إني كنت حامل في الشهر التاسع وروحت يوم 2026/4/13 علشان أولد طفلتي في مستشفى الحسين الجامعي في الجمالية ودخلت غرفة العمليات وولدت بنتي بعملية قيصرية وبعد كده المستشفى دخلني غرفة إفاقه وبعد ما فوقت جابولي بنتي ونقلوني لغرفة ثانية وكان معايا والدتي وجوزي مشي علشان وقت الزيارة كان خلص.
وأضافت: تاني يوم الصبح فيه ممرضة جات وقالتلي إني هتنقل في غرفة تانية فطلعت أنا وأمي معايا بنتي المولودة في الطرقة وكنا رايحين الغرفة التانية وفي الطريق فيه واحدة ست منقبة قابلتنا وعرضت المساعدة على أمي علشان هي كانت شايلة المولودة وشنط وكانت مسنداني.
وأكملت: فعلا الست دى سندتني لحد لما رحت الغرفة الثانية وهناك فضلت قاعدة معانا وكانت بتساعدني في إني أغير للبنت هدومها وكانت قاعدة معانا ولما سألناها أنتي مين قالت إن عندها حالة ولادة في المستشفى ومش عايزة تقعد لوحدها ففضلت قاعدة معانا وشوية وطلبت من أمي تروح تعمل حاجة سخنة علشان نشربها وجوزي كان وصل وقاعد معانا.
وأردفت: وبعد لما أمي مشيت طلبت من جوزي يروح يصرف روشته الأدوية ليا ويجيب لي مسكنات فنزل وأنا كنت تعبانة قوي وعايزة أنام فسألت الست المنتقبة دي وقالتلي هاتي بنتك أشيلها وأفردي جسمك إنتي وريحيي وأنا كنت تعبانة قوي بس مردتش عليها بأيوة أو لا وهي راحت شالتها وأنا من كثر التعب عيني غفلت حبة صغيرين قوي.
وواصلت: بعد شوية أمي جات وسألتني عن الطفلة فقولتلها أنها جانبي في السرير فراحت تبص عليها لقيت بطانية ملفوفة أكنها طفل بس فاضية من جوة فكلمت جوزي وسألته إذا كان أخد الطفلة معاه ولا لا فعرفت إنه ما خدهاش معاه فبلغت الأمن وعرفنا إنهم شافوها وهي ماشية بالطفلة برة المستشفى فبلغنا الشرطة وده كل اللي حصل.
سيتم تحسين تجربتنا على هذا الموقع من خلال السماح بملفات تعريف الارتباط
التعليقات 0